Naakte nabetragting

jy is weer hier
ek herroep jou lippe - dun soos 'n tweesnydende swaard
(maar nooit om my te wond nie)
die klam betasting onmiskenbaar, met my borste
wat opstaan in herinnering
die vreemde taal wat jy gemompel het (meestal onsamehangend)
het ek verstaan, my lyf was 'n gretig leerjonge
immer aan't kriewel soos 'n Afrika geitjie
onder jou laatmiddag hande

die see het skuim gespu teen ruite
maar jy het deur branders van glas geloop
tot binne in my wellus - jou bronstigheid en
die blou oorlog in jou oë was my ondergang

die grond onder my voete het gesidder met jou aankoms
en doods geswyg in stille nabetragting elke keer
as jou truligte om die verste draai verdwyn
ek het meermale geween as gelag, het jy geweet ?

maar passie was 'n tydbom waaruit pluime en pouvere
soos onkruid gespruit het, die laventel in my voortuin het
verpers en verinnig as jy hier was - ek was dronk
van jou musk gemeng met die blomgeure in my straat;
jou beeldspraak was nat, het soos blare gekleef
aan my tong my mond my oopgesperde dye -
jou asem die draak wat my kon vuur tot hoer

daar is 'n yswind wat loei vanaand
en my Maria-kleed wapper wit in die nag
op my wasgoeddraad
maar ek sweet van slegs een ontblote gedagte.

© 2011 Almarie Truter

profound.
Kan oor en oor verdwaal hierin.

Beste Ammie,

Die tweestryd tussen dit wat oenskynlik reg is en ons vleeslike begeerstes voer botoon in hierdie werk van jou. Die gedagte dat menslikheid die oorhand kry en n sterk teenwoordigheid het is onmiskenbaar met die die amper skuldgevoel Maria-Kleed wat wit wapper in die nag op my wasgoeddraad.(so asof die rein Maria-Kleed wit gewas moes word van aardse begeerte, dat dit nou wit wapper, vry van begeerte te midde van jou donker begeerte.) Dis opvallend dat die kleed buite is so asof dit vir eers verban is. Dan gaan jy en vertroebel weer die kleed met net een ontblote gedagte wat weer sweterig aan die kleed gaan kleef.

Jou beskrywing van die erotiese ervaring - jou asem die draak wat my kon vuur tot hoer! Hierdie omskrywing het my laat steier en laat regop sit en kennis neem van jou verblindende vermoe om uitmuntende gedigte te kan skryf. Ek dink nie ek kan of sal maklik erotiese werk skryf maar ek het finominale waardeering vir hierdie eerlike en gesofistikeerde stuk werk. Kunswerk "uit die boonste getoeltes"

I am as always you humble servant!


SWERWER

I thank you kind Sir !

Soos altyd is dit 'n groot bederf om kommentaar van jou af te kry, juis vanwee die feit dat jy moeite doen om ' boots and all ' in 'n gedig in te klim - dis 'n kosbare karakter by weinig lesers, des te meer waarderend....dankie daarvoor !By jou interpretasie en uitlig is daar weinig wat ek kan byvoeg (jy raak alte bekend met die ink in my pen Mnr Schoeman) ....Ek kan miskien net aanvullend noem, dat tesaame met die akurate uitleg wat jy reeds gegee het, simboliseer die "Maria'' verwysing vir my persoonlik na die staat van reinheid, van nuwe lewe/nuwe wyn/nuwe begin, die fase van '' na die sondeval '' - in teenstelling met die vleeslike 'val'/'stryd' (herinnering/gedagte)wat soms die herwone stand/oorwinning bevlek ...Alhoewel hierdie geensins 'n religieuse gedig is nie, is die beeld wel simbolies...Baie dankie vir jou woorde van lof, soos altyd staan ek klein.