Ontmoet my weer
by Pont Saint-Bénezet se kolom
in Avignon
en voordat horlosies ons keer
dwaal ons deur die stegies
vergeet ons die realiteit dalk flussies
ja, kom ons ontsnap die werklikheid
langs tydgetorringde mosbegroeide
sprokie-geboue tussen laventel-lande
in Avignon se fabelagtigheid
hier waar die kerk die Roomse pater
kortstondig verloor het
red my lewe met liefde soos Romeinse water
van ver af soos met die Pont du Gard
laat my weer vergesigte sien
soos vanaf die Rocher des Doms
laat my aan jou bedien
millefeuille aux legumes au tapenade
asof ek die liefde se taal weer verstaan
en asof my afgestompte tong
weer elke kruiesmaak sal herken
kom ons probeer tyd terugwen
kom ons dans in die somerson
kom ons plak die blaaie terug
wat van die kalender afgeskeur is
net as jy lus is
in Avignon
©Torm 2011
