Bewaar hierdie woorde *

Iewers tussen die skaam
beautiful onskuld
van die dogter wat jy is
en die mooi jong tiener
wat reeds in jou vasgevang is

iewers tussen die sterre in jou oë
wat soms so ondeund kan flits
en soms so ongelooflik selfversekerd is

iewers tussen die sag van jou amper tiener-lyf
wat nog so na drukkies smag
en jou pinkie waarom jou mamma gedraai is

iewers net links van jou huppel-hart
en net bo jou naelstring
wat nog aan jou mamma verbind is

iewers diep binne-in jou versigtig versteek
lê daar ñ kosbare jongvrou-saadjie
waarvan daar net een is
geduldig en wag om te ontkiem
wanneer die tyd ryp is .

So bewaar hierdie woorde
en dra dit naby aan jou hart :

onthou dat jy SPESIAAL is
en dat jy uniek jy is
daar is net een van jou

onthou om altyd NEDERIG te wees
selfs in oomblikke wat jy
die hef in die hand het en onoorwinlik voel

onthou die woordjie RESPEK
maak seker dat jy dit in elke vorm ken
deel dit uit en sorg dat jy dit altyd kry

wees altyd OPREG met innige bedoel
want jy word geoordeel aan jou karakter
en die inbors wat jy het

kyk die lewe vierkantig in die oë
en wees nooit skaam vir wie jy is
want jou TROTS sal jou altyd deurdra .

Onthou dat alles nie altyd maklik is
onthou dat daar soms hartseer is
dat daar soms trane is
dat die lewe soms donker is
dat daar soms mislukkings is

onthou dat die dinge soms onverstaanbaar is
maar die meeste van als
othou dat die lewe
nie altyd sin hoef te maak nie
dat goed soms net gebeur
dat daar nie ʼn doel met alles is nie .

En as jy struikel
en as jy val
onthou om op te staan
en aan te gaan

want daar is altyd hoop
want daar is altyd balans
en daar is altyd ñ nuwe dag .


( * Cailynn , vir jou 11de verjaarsdag
8 Mei 2011 .
Van Oom Storieman
05/08/2011 22h14 )