Wees gegroet, somerskind

wees gegroet, skone lentebloeisels
soet is die smaak van jul uitvloeisels
selfs bye kan dié geur nie weerstaan
lokkend jou vrug, gloeiende rooi maan

wees gegroet, geliefde somerskind
met hartlike kus deur songlans verblind
aan siel met vergulde lint ewig verbind
onbewus glinster-gloed drome verslind

wees gegroet, liefde wat lank gelede was
reënboogkleure eens jou prag-verfkwas
stadigaan verbleik, grysvaal reste soos as
gister se grou skaduwees hou steeds vas

wees gegroet, gevreesde ys van winterkou
vriesende vingers wese al stywer omklou
bibberend, snerpend, liefdesgeluk weerhou
lewenslus stelselmatig in haar laat verflou

wees gegroet, moed, hoop, lewenskrag
hoor sy jou fluistering, al is dit hoe sag
môre... dalk môre, sal liefde êrens wag
groet somerskind 'n nuwe, wolklose dag.

2011/10/05 Joan Lotz

Lekker om jou werk weer te lees Joan! en treffend soos altyd

Baie dankie, Ronel...bly om hier te wees!

wees jy ook baie hartlik gegroet, mooimens uit die woesteland !

Hallo moeder Lin....'n eer en heerlikheid om moedergoed hier te verwelkom !

...en hierdie vers getuig weereens van die goue pen in jou hand wat somer soos 'n vere-pluim laat oopbars ! Werklik pragtig !

lekker om te lees en te leef, welkom hier

Me. Lotz herinner my aan skooltyd toe onderwysers nog kon slaan en die hoof die hardste kon slaan. Daarmee bedoel ek u herinner my aan 'n tyd wat ek mens wou wees en vir ware gesag kon vrees. Gesag wat my nie verniel of verkul het nie, maar my belange en groei op die hart gedra het. Gesag wat die gevare geken en deurleef het. U is vir my 'n werklike inspirasie en dit is die allergrootste voorreg om u hier te kan verwelkom. Hierdie vers is pragtig! Ek voel (gepas) nederig en klein by die lees daarvan.

Dagse Joan,

Ek verwelkom die somer saam met jou en jou vers doen dit vir my op so n mooi manier. Dit is voorwaar n gelukkige somer bries wat jou hier by ons kom aanwaai en ek vir een is verskriklik bly om jou hier in ons midde te he. Welkom.

SWERWER

Wow...dis stunning, laat my soos 'n koninginby voel en dit is wonderlik...ek sê baie dankie aan elkeen wat my so hartlik hier verwelkom, dis so spesiaal!
Eerstens, aan Benny wat my so geduldig deur amper al die stappe gelei het om 'n behoorlike entree te maak...netwerk was nie al die tyd so vriendelik nie, giggel, baie dankie, weer!
Anderkant: jou woorde laat my rondtrippel van pure opwinding en die gevoel wat dit in my hart tuisbring, dat hierdie 'n besondere blad is en ek gaan myself met woorde hierin vestig wat uit waardering hierdie geleentheid sal vereer, baie dankie vir jou mooi welkomsgroet!
ammie: jy is spesiaal en ek voel ek is in goeie geselskap hier by julle, baie dankie ook vir jou mooi woorde van verwelkoming.
Fafnir, Enid en Swerwer, spesiale dank ook aan elkeen van julle...hoop ons gaan heerlik oor en weer kuier met vergulde woorde wat sprankel...ek voel reeds tuis, met julle almal hier om my!

Ek het Guest vergeet...baie nalatig, baie dankie vir die mooi blommetjie as welkomsgroet...dis 'n mooi gebaar en ek waardeer dit!