Onsigbare skoonheid

Onsigbare skoonheid

Die sagte basuin van ‘n serafskoor
in ‘n simfonie van kontrasterende
vokale en konsonante, in harmonie.
Die Saligmaker self inspireer intensiteit.
My aandag is gekerker in ‘n labirint
van sagvloiende strome helderheid.
Chaos staan verstar
met Onkunde en Waansin aan beide kante.
Saggies, ritmies,
sweef die suiwerheid
in vernietiging deur valsheid.
Passievol, eerlik,
gloei die liefde
in die melodie van ‘n vrou.
Haar voorkoms,
onbekend.
Haar teenwoordigheid,
onmiskenbaar.

G. Hermens, 01-07-2008

Beste Gerrit,

Ek staan stom van genot en waardering vir hierdie asemrowende vers. WIE is hierdie vrou? Is hierdie dalk jou liefde wat jy vir die eerste keer gesien het? As hierdie n liefdes vers is aan n vrou, wat ek dink dit is, sal enige vrou swymel voor jou.

Moet asseblief nooit jou passie verloor of sienies word nie!

Pragtig.

SWERWER

Raak ek nou sommer opsluit lus om 'n ' mexican wave ' vir jou hier in die weskus te begin vir hierdie wonderskone vers van jou....asemloos ! Maar gun hierdie aweregse maanvrou om gou 'n bietjie te rafel en torring aan jou (besonders begaafde) skrywershand...

Vraag : Besing jy hier in geheel die wonder en skoonheid van 'n spesifieke vrou of die ' universele vrou ' ? (indien die hele vers, van begin tot einde, die/'n vrou beskryf, verdien jy hier by my punte wat jou nog lank in my goue-sterretjie-boekie gaan hou - absoluut stunning!)

Persoonlik dink ek dat hierdie asemrowende vers NOG meer tot sy reg sou kom indien jy dit tegnies bietjie meer geskaaf het - 'n verdeling in strofes sou 'n vloeiende 'lees', voordrag en begrip aan dit verleen het....(Ek dinkskrum sommer nou bietjie met jou en wil vir jou voorbeelde en alternatiewe opsies wys in die aanbieding van hierdie vers - dus preek ek nie nie of probeer ek jou nie leer nie, ek breek sommer brood saam met jou en ons deel 'n glasie wyn oor hierdie vers se moontlikhede)...So in die lig hiervan, kyk bietjie wat 'n verskil strofes aan jou vers kan maak...

Bv:

Die sag basuin van ‘n serafskoor
in ‘n simfonie van vokale en konsonante
in perfekte harmonie.

Die Saligmaker self inspireer intensiteit.
My aandag is gekerker in ‘n labirint
van sagvloeinde strome helderheid.

Chaos staan verstar
met onkunde en waansin aan beide kante.
Sag en ritmies sweef die suiwerheid
in vernietiging, deur valsheid.

Eerlik en vol passie
gloei die liefde
in die melodie van ‘n vrou.
Sy, onbekend
maar haar voorkoms
en teenwoordigheid -
onmiskenbaar.


Of so iets......Nietemin, hierdie maanvrou geniet jou werk terdee ...doet so voort !

Die was my eerste Afrikaanse gedig... Dit bly een van my favourites!!!
Wooooow! Swerwer dis 'n voorreg dat jy sooveel genot uit my werk put! Dit was 'n vers wat ek opgedra het aan die God-gevormde vrou. Die vrou soos Hy bedoel het vir haar om te wees... Die vrou wat ek met groot vreugde aanskou en met groot waardering in nederigheid bestudeer...
Maanvrou... die Mond Frau (Deutch)... Dis vir my 'n onbeskryflike moment of awe, wanneer 'n mede skrywershart saam met my wil skaaf aan my werk! Dit staan vir my gelyk aan Adam wat saam met God moes regeer oor God se skepping! Insens. Subliem! Baie dankie! Ek sal dit verseker aanpas!

O pragtig! Gemeet aan God se grootheid en plan, skiet ons mensdom ver tekort. Jy het die volmaak geskepte vrou soos aanvanklik beplan baie goed verwoord en daarvoor verdien jy 'n 'tjie! Let net op die tikkersfoutjie wat "sagvloeiende" moet wees en ek stem saam met Ammie dat jy dit bv. in verse moet opdeel. Geniet jou werk.

Baie dankie SJ! Waardeer dit innig! Het 'n hersiende weergawe geplaas, laat weet my asb wat julle daarvan dink