vlieg hoog

kom sit hier by my,
kleine kleine kindjie,
klim en klouter
tot bo op my skootjie,

vandag wil ek vir jou vertel
die son is blou
en die hemel is pienk ;
as dit die kleure is waarvan jy hou.

knyp jou ogies styf-styf toe
en droom die allermooiste drome,
dans saam met die feetjies
en klouter kaalvoet tot hoog in die bome.

jy, kleine kleine kindjie,
mág droom en glo,
want jy, kleine kleine kindjie,
is 'n geskenk van bo.

© (2011) Rudi Prinsloo
Alle regte voorbehou / All rights reserved

kan ons nie maar elke klein brose siel so grootmaak,... dromers en denkers van hul maak?

Die vers is so so mooi - ek hou baie hiervan! ...die spreek so half-half van die innocence en opregtheid van kinders...wat glo alles wat jy hulle vertel. Soos altyd uitstekend Rudi!

Ek glo daar is twEe kinders wat baie gelukig is dat hulle n papa soos jy het. Dankie vir jou
Bystaan.

Ai Rudi, hierdie is so so mooi en met soveel deernis geskryf (ek kan dit voel)....Ek wil my 2 wippies ook altyd in 'n feetjietuin hou, maar hulle word so gou groot....Jou vers het my aan een laat dink wat ek sowat 18 maand gelede geskryf het vir my wippies, dit nadat ek hulle slapende onskuld staan en aanskou het een aand met slapenstyd :

My wippies se droomland versie

Huppel trippel liggies
oor wolke drome sag
speel met Klaas Vakie
in die middel van die nag
.
Vang vuurvliegies met ster-stertjies
sit hul in 'n fles,
loer na klein baba voëltjies
in die nagtegaal se nes.

Dans saam met feetjies
in die volmaan se kring,
drink suikersoet nektar
wat bytjies vir jul bring.

Speel met kabouters
langs die silwer waterstroom
waar mooi jonge meisies
heeldag sit en droom.

Vlieg saam met vlinders
tussen roos in volle blom
en voor jul weet is dit oggend
die donker nag reeds om.

Dankie aan ALMAL vir julle gawe kommentaar. My kinders is my lewe - dankie vir julle deelname hier.

jip dit is dierbaar ; ) net soos hulle is