Wat is in 'n taal ?
'n spinneweb van letters wat in dou mosaiek
my naam verewig in argiewe van my geboortegrond,
selektief, die broos dialek van my voorvaders klad
teen die verhemelte van my reënboog nasie
Wat is in 'n taal ?
wat my voetspore verewig vir my telge
om te volg, my tongval kloon in die
sputter spetter spoegsels van my
Maria-dialek,
wat met maagdelike trots my gedra het,
my gebaar het in die gloed van aga-stowe
in plaaskombuise van hierdie donker kontinent
Wat is in 'n taal ?
wat my passaat verleen het waar twee oseane
ontmoet, gewortel het aan die voete van 'n berg -
saad geskiet het in die vrug-aarde-vallei
van godespys en nagmaalwyn,
my klein klein gesoog het aan 'n soetmelk boesem
waar die suiderkruis kaats oor Afrika
Wat is in 'n taal ?
wat my definieer van die res,
my silhoeëtte ets teen kliprante
blouselblou berge
wingerde en groen koringlande
tussen fynbos geur en proteahange van Paarlberg
Dit is 'n taal
Dit is my taal
Afrikaans
© 2011 Almarie Truter
