Calvinisme

Die brandende vuur van passie
so lank verborge
onderdruk
wat verterend smeul
knetter
terwyl die hart verhard
die emosie versmaai
word die eie ek in my
verstrengel
verwurg
verraai
die eerste asem van vryword
diep uit borskas geskeur
die herkenning van gedeelde pyn
die stryd teen waardes
kwyn
verdoffing van calvinistiese konvensies
vervaging in nuwe ervaring
waardering vir lewe
geskenk
gegee
geneem
jou oë 'n spieël vir my gedagtes
van emosie diep verborge
van passie geknel
in bande van hel
die stryd teen eie inbors
gewoonte van weerhouding
ingedonner van eerste tree af
ander s'n
hande af
jy mag nie vat nie
maak nie saak wat nie
dit is vir pis
al is jy hoe lus
dis lelik dis vuil
gevaarlik
vieslik
dierlik
die soetheid van
jou warm lyf
die skokke van jou vat
jou lippe smeulend
tergend
vuurstrepe oor my vel
nat spore van smagting
verlos in donker ure
bevry
my van die kettings
deur gewoonte vasgebind
gesweis deur meester welder
van selfweerhouding
miskenning
veragting
in die eerste soete orgasme
breek die kettings om my siel
spat in duisend stukkies elke
twyfel
wanhoop
skans
neem besit van my die passie
soveel jare diep begrawe
versmoor deur geen erkenning
verroes van ongebruik
styg uit bo die mure
om my gemessel in sement
gemeng met soveel ywer van
veragting
weerhouding
verwyt
die opgedamde frustrasie
breek die damwal oop
stortvloed van emosie van passie
storm deur die vallei
waar eens dit droog en dor was
oorspoel die banke
sleur mee alle inperkinge
vernietig elke hindernis
laat in sy wyk
vryheid
volheid
vreugde
ek staan verstom by die ontdekking
van 'n mede drenkeling
uitgewerp deur ruwe branders
op my eiland van ballingskap
byna verswelg
verdrink
lawe ons mekaar tot
eerste lewe terugvloei
bloed weer vry kan loop
dans ons siele in die sterre
weerkaatsend in jou oë elke
honger
gedagte
begeerte
ek verdrink my aan jou heuningpot
vereet my aan jou lippe
jou hande
mond
lei my op nuwe paaie
wys my nuwe panoramas
maak van my 'n hele mens
ongebonde aan konvensies
in absolute eerlikheid
deel ons in die heerlikheid
van uitbreek
afgooi
wegbreek
van kettings en bande
en knellende hande
van mure
en skanse
van kranse
en tronke
word ons een keer op keer
op wolke van verwondering
sweef ons bo die aardse bande
dra jou skreeuende verlossing
weergalmend teen die mure
uit die boodskap van ontdekking
van vryword en verligting
die herontdekking
van die eie ek
die oorgee aan my passie
die verlossing deur ontlading
die uitleef van emosie
ongebonde deur konvensie
die mekaar verstaan sonder
woorde
maning
verwyt
die gee en neem van mekaar sonder
terughou
wonder
spyt
laat als verdwyn
vervaag
tot al wat oorbly die wonder is
van vrede
van genot
van behaag

Calvinisme in die visier? Baie goed gedoen ... tog dink ek dat die verskil tussen ware Calvinisme en verrotte Calvinisme in so `n aanbieding ook `n plek behoort te kry ?

Dankie Fafnir! Ek het my mes net so ietwat in vir die skynheiligheid wat so gereeld met Calvinisme saamloop, nie soseer met Calvinisme as sulks nie

ek bedoel ook maar net dat die leser wat dalk `n eerlike, opregte Calvinis is ( en wat self onder die skeinheiligheid ly , wat jy noem ) nie saam met die badwater uitgeslinger word nie ; dat ons ten minste die MOONTLIKHEID van sy opregtheid behoort te eer ... Maar dis geen 'hectic' saak nie , Danie !

Wel...dalk moet ek net die naam verander? Nee, ek stem heelhartig met jou saam. Terloops, ek is steeds ook 'n Calvinis!

my eie knieë voel weer tuis op `n houtbankie onder `n padre se seënspreuk : Welkom hier, broer in Christus !

Baie dankie! Dis nie waar ons bid wat tel nie, net hoe ons bid, ne?!

jy sê dit .... mits ons liefde betoon .

op my knie praat ek nie met my god, seker voet onder sterre hemel,gewortel soos die boom van my hart, palms uitgereik na mag van hemele, maar voorwaar hierdie loutering van misvormde calvinistiese waardes ken ek sekerlik aan sy smaak! welkom by ons jou skrywe spreek van pyn jy hier sal kameraadskap mee vind

Dankie Ronel!

En hier staan die aweregse maanvrou en voel ek genoop om ook my waas om die maan te trek.... Danie, wat 'n uitmuntende skrywe van selferkenning, die inner kastyding en skuldaanklag ('n tipiese calvinistiese wapen en magsbeheer) en die uiteindelike besef en losbreek uit die klug en mensgemaakte kettings van hierdie ballingskap ! Voorwaar is ''vryheidslied'' 'n ''Cry Feedom'' ! Ek saluut jou hiervoor. Ek vir een, is ten gunste vir die aanvat van Calvanisme (selfs in sy sogenaamde suiwerste vorm) Hierdie lering (waarin ekself opgevoed en geskool is) was die mens van die begin af vyandiggesind en het volgelinge ewige gevange gehou in skuld, aanklag, ontoereikendheid en twyfel (nie 'n geestestoestand wat ek glo, die God van liefde vir sy kinders in gedagte het nie) ......ps: Ek hoop nie jy oorweeg steeds om jou titel te verander nie.

Mag ek net 'n klein puntjie van kritiek lewer ? .... Die gebruik van hoofletters aan die begin van elke sin (selfs buite konteks) is uiters steurend op die leser se oog en verbreek die natuurlike vloei en lees van die vers en stroop ook die vers van sy natuurlike ruspunte en ritme.Ek weet die "WORD" program (waarvan ek geen voorstaander is nie) gooi outomaties elke nuwe reël uit met 'n hoofletter, daarom juis die noodsaaklikheid om 'n finale werkstuk te proeflees en onvanpaste hoofletters te verwyder ten einde die finale gedig tot sy volle reg te laat kom.

Nietemin, hierdie vers van jou is 'n besonderse werkstuk waarop jy trots kan wees. Baie welkom in ons Freestyle midde, jy is so welkom hier en ek persoonlik kyk uit na nog vrugte uit jou pen.

Danie, hier vind ek 'n vreemde dog gepaste ooreenkoms met Andre Stander - wat ook maar in sy eie wese geskop het teen wat vooraf bepaal was as reg en verkeerd. Op die ou einde het hy egter "gesterf" in sy vreemde land, waar jou vers die hoop op 'n nuwe lewe uitspreek in daardie (tot nou toe) vreemde land. Welkom tuis!

Danie,

Ek sit hier en bewonder jou eerlikheid en passie waarmee jy hiedie onderwerp storm geloop het. Ek vir een is n militante teenstander van Calvinisme omdat in sy oorsprong die reel vir n vol lewe beperk en n teelaarde geword het vir mense om te heers oor ander deur skulgevoel en reels. Trouens ek dink dit het soveel skade aan Christus se boodskap van naasteliefde gedoen en vandag sit ons met duisende mense wat emosioneel stukkend is. Ek verkondig nie losbandigheid nie maar om met integriteit en in liefde met ander en die lewe te handel.

Welkom hier by ons... n sterk stem daar uit die bosveld.

Ammie jou insette as "redakteur" is opbouend en ek vir een sal graag meer daarvan wil sien.

SWERWER

Hmmm...Ammie, baie dankie vir jou positiewe kommentaar, dit bevestig weereens hoekom mens die blinde sprong waag en jou innerlike struwelinge deel met ander...al dan in die vorm van 'n gedig. Die vers lyk totaal anders in sy oorspronklike vorm, maar ongelukkig wil hy nie só hier plaas nie- irriterend, maar wat sal mens maak?!

Anderkant ja, ek word gereeld gevra of ek familie van André is, en met 'n bloos moet ek erken dat ons wel dieselfde bloed deel- maar baie verlangs! Ek sal netnie heeltemal so ver gaan soos hy om my...rebelsheid!...te toon nie!

Swerwer, ek hoor waar jy vandaan kom, maar voel tog ek moet darem opkom vir die Calviniste wat puriste is. Ongelukkig is dit so dat Calvinisme gekaap is deur 'n segment wat die onderdrukking van individualisme bevorder en daardeur afbreuk doen aan God se ware boodskap. Maar ek kan slegs teen hulle in opstand kom en nie teen almal nie. Ongelooflik baie mense, binne die Calvinistiese samelewing, is beslis rolmodelle vir my, maar hulle veg 'n opdraende stryd...

Ek wil nie graag pedanties klink nie , maar behalwe vir Anderkant het ander kommentatore se bydrae die reuk van reaksionêre oordeel ... hoeseer mense ookal verontreg voel deur WATOOKAL behoort dit ons nie te bind in die kettery van voor-oordeel nie : Ek volstaan dat ook Calvinisme `n regverdige spreekbeurt behoort te kry { al is dit net teoreties! } So nie loop ons die wesenlike gevaar om presies dieselfde weg as die gewraakte dekadente godsdienstigheid te loop !!

Eish! Klink my ek het 'n redelike aktuele onderwerp hier aangepak! Maar goeie oop gesprek het nog nooit skade gedoen nie, né?

Sjoe Danie - Ek glo nie jy het so reaksie verwag nie! Weereens welkom geweet om jou te nooi sal n aanwins wees. Uitstekende uitbeelding van ons leer van reg en verkeerd. Ons liewe ouers en die res van die valies sit op daai bankie saam, net iemand wat daardie lewe ken kan so eerlik daaroor skryf. Knap gedaan.

Hehehe! Ja, ek dink ek en jy het albei genoeg deurgeloop al in ons wonderlike ou dorpie, né? Maar dit ís lekker om vry en ongebonde te skryf (en kritiek te ontvang!)

Soos my liefling woord dit wonderlik beskryf "Fantasmagories" (eks nie blond soos Paula nie hoor) En tog, ek mis daardie ou dorpie tot in my siel, maar woon en bly baie lekker hier. Sterkte, en onthou al die kritiek is net goed vir jou, geniet dit om jouself te wees hier. Ek's klaar verslaaf!!! moet maar erg self dissepline toepas om nie die heeldag ingelog te bly nie.

Glo my, ek geniet hierdie kritiek geweldig baie! En jy is reg...dis verslawend!!!

Danie, kom ek gee jou 'n tipp....Wanneer jy jou werkstuk spoeg en plak dan 'send' jy dit dadelik...dan sodra dit gepubliseer is gaan jy terug na jou gedig en druk die edit knoppie.....dan kan jy redigeer en spasieer soos jy wil en sal die sisteem dit vir jou regmaak....Skree gerus as jy hulp nodig het .... groete Ammie...

Dankie Ammie, ek sal bietjie probeer... Hopelik kry ek dit reg en hou jy ook meer van die oorspronklike vorm...

Fafnir, ek stem saam met you beroep om Calvinisme n spreukbeurt te gee en gun dit heelhartig vir al die akoliete van Calvinisme.

My grootste probleem le met mense wat die boustene van Calvinisme gebruik het om gevangenisse op te rig waarin miljoene mense se vryheid ingeperk is. Ek gun enige iemand die reg om sy oortuigings en dogma na te volg maar ek behou die reg om daaroor te verskil.

Reaksioner, glad nie. Te veel emosionele ongevalle en casavac's le oor die vlaktes gestrooi, en al vir baie jare, om nou die mantel van reaksioner oor die skouers van komentatore te kom hang. Die wegbeweeg van duisende kerkgangers, wat die afgelope dekade en meer hul renons en ontnugtering te kenne gegee het oor die drie Canvinistiese gefundeerde instellings in ons land is nie vir my reaksioner nie maar n opwelling en hunkering na iets beter.Iets om nader aan die Goddelikheid te beweeg.

Daar is vir my n groter waarheid as Calvinisme en n opwindende vol lewe te vinde in die mistieke en " spiritueele" in Christus.Ek dink ons is oor eeue nie toegelaat om die groter waarheid te sien nie.

Ek bewonder egter jou standvastigheid en dat jy die moed van jou oortuigings het. Iets wat n held van n Kryger maak.

SWERWER

Claira,

ek ken jou!!! LTL Great om te sien wie dit is. Kan nie glo dat ek jou nie geein het nie. Nou weet jy waar ek gaan wegkruip het!!!

SWERWER

Eureka!!! En ek ook hier weggekruip!!