Ek soek jou in die lanings bome
in die ruising van die wind,
soek na jou in stofstreep trane
op die wange van 'n kind,
soek na jou in donker nagte
wat struikel in my spoor,
ek soek na jou verbete
êrens het ek jou verloor
Ek soek na jou in skadumure
uit gebreekte klip gebou,
soek jou in verdwaalde oë
wat my herinner aan jou,
soek na jou in afdraai paaie
se windverwaaide spoor
want iewers langs die pad
het ek jou verloor
Ek soek jou sonder rigting
ek soek jou sonder tyd
soek jou sonder kompas
ek soek sonder woorde wat wil uit.
Ek soek jou in die stiltes
wat eggo in my oor,
ek soek jou in die uil se eensaam roep
wat ek in die nanag hoor
maar ek weet
ek het jou finaal verloor.
© 2009 Almarie Truter
( 20 Nov. 2009 )
