Feëtjievrou ( 8 )

Daar is ñ heelal in jou oë
waar ek in verwondering
deur wil reis
tot in die sag
van jou siel
duskant die warm
van jou hart se klop .

Ek wil my kop
daar op die kussing
van jou voel neerlê
my wang rus
teen jou elke gedagte
my oor wat luister
na jou hart se elke fluister .

Daar is ñ wêreld in jou gees
wat ek wil ontdek
van kant tot hoek
so sorgvuldig bedek met jou vlees
en diep weggesteek agter jou skaam glimlag .

Ek wil jou sewe wonders besoek
jou elke grafkelder penetreer
jou elke artefak jou elke skat
bewonder en versigtig restoureer
tot die vroeër glorie wat dit eens was .

Daar is ñ warmte in jou bestaan
verskuil agter jou elke traan
en ek voel die hunkering
in jou elke versugting
soos wat jou hoop taan .

Feëtjievrou

soms in die lewe
is daar meer vrae
as wat daar antwoorde is

soms in die lewe
is daar meer donker
as wat daar lig is

maar dit is
en bly
net soms .

Die waarheid is
skaars onder die oppervlak
van jou kelder-bestaan
geslote agter geheime gisters-gange
skuil die ware jy
wat soveel voel
wat soveel
het om te gee
wat eeue lank al
in donker-stilte wag
om ontdek te word.

Ek wil jou sewe wonders besoek
jou elke grafkelder penetreer
jou elke artefak jou elke skat
bewonder en versigtig restoureer
tot die vroeër glorie wat dit eens was .


( 30/04/2011 13h20 )